2024 එක්සත් ජනපද ජනාධිපතිවරණ සටනට පිවිසීමට මේ වන විට සැලසුම් කර ඇති රිපබ්ලිකන් පක්ෂයේ අපේක්ෂකයින් තිදෙනාගෙන් දෙදෙනෙකු ඉන්දීය සම්භවයක් ඇති අමෙරිකානුවන් බව විදෙස් මාධ්‍ය වාර්තා කරයි.
නිකී හේලි සහ විවේක් රාමස්වාමි එම අපේක්ෂකයින් දෙදෙනා වෙති.
විදෙස් මාධ්‍ය වාර්තා කළේ, නිකී හේලිගේ නම දේශපාලන වේදිකාවට හුරුපුරුදු වුව ද ජනාධිපති ධූර අපේක්ෂක විවේක් රාමස්වාමිගේ නම එතරම් හුරුපුරුදු නොවන බව ය.කෝටිපති ව්‍යවසායකයෙකු සහ Woke, Inc. පොතේ කතුවරයා වන රාමස්වාමි මහතා පෙබරවාරි 21 වන දින Fox News වැඩසටහනකට සහභාගි වූ අවස්ථාවේ සහ සිය දේශපාලන මතවාද ඉදිරිපත් කරන වීඩියෝවකින් තමන් ජනාධිපතිවරණයට තරග කරන බව ප්‍රකාශයට පත් කර ඇත.
ඔහුට අවශ්‍ය වන්නේ, “විශිෂ්ටත්වය හඹා යාම” මත පදනම්ව “නව අමෙරිකානු සිහිනයක් නිර්මාණය කිරීම සඳහා සංස්කෘතික ව්‍යාපාරයක්” දියත් කිරීමට වන අතර ඔහු පවසන්නේ ඒකාබද්ධ හා ක්‍රියාකාරී සමාජයක් නිර්මාණය කිරීමට විවිධත්වය පමණක් ප්‍රමාණවත් නොවන බව ය.
එක්සත් ජනපදයේ ඔහායෝ ප්‍රාන්තයේ උපත ලද 37 හැවිරිදි විවේක් රාමස්වාමි හාවඩ් සහ යේල් විශ්වවිද්‍යාලවල අධ්‍යාපනය ලබා තිබේ.
ඔහු ජෛව තාක්‍ෂණ ව්‍යවසායකයෙකු ලෙස මිලියන ගණනක් උපයා ඇති අතර පසුව වත්කම් කළමනාකරණ සමාගමක් ආරම්භ කර ඇත.
ජාතිවාදය සහ දේශගුණය කෙරෙහි ව්‍යාපාරික ලෝකයේ හැසිරීම් සහ ආකල්ප ගැන ඔහු දක්වන පිළිකුළ සම්බන්ධයෙන් හඬ නගා ඇත්තේ, එය ව්‍යාපාරවලට සහ රටට හානියක් වන බව පවසමිනි.
සමාගමක සමාජයීය සහ පාරිසරික බලපෑම මනිනු ලබන පරිසරය, සමාජ සහ ආයතනික පාලන මුලපිරීම්වලට ඔහු විශේෂයෙන් විරුද්ධ වී තිබේ.
රාමස්වාමි මහතාගේ අදහස් 2022 මධ්‍ය වාරයේදී නිව් හැම්ප්ෂයර් වෙතින් එක්සත් ජනපද සෙනෙට් සභාවට තරග කළ රිපබ්ලිකන් පක්ෂ සාමාජික වික්‍රම් මන්ෂාරමනී වැනි අයගේ අදහස් හා ගැළපෙන බව විදෙස් මාධ්‍ය පෙන්වා දී ඇත.
මේ වන විට ලොව ප්‍රබල රටවල් ගණනාවක ඉහළ පෙළ තනතුරු හොබවන අය අතර ඉන්දියානු සම්භවයක් ඇති පිරිස්වල නැගී ඒමක් දක්නට ලැබෙන අතර ඒ අතරින් අමෙරිකානු උපජනාධිපති කමලා හැරිස් සහ බ්‍රිතාන්‍ය අග්‍රාමාත්‍ය රිෂී සුනක් කැපී පෙනෙන බව විචාරකයෝ පෙන්වා දෙති.