අනුෂා දමයන්තිගේ ගණිකා මඩම ඇත්තක්ද?
දවසින් දවස රටේ කාන්තාවට සිදුවන හිංසනය, ළමා අපචාර විවිධ මාධ්‍ය හරහා අපට අසන්නට ලැබෙනවා. හැබැයි හැමදාම කාන්තාවන් වෙනුවෙන් හඬක් නැඟූ ඔවුන්ට ශක්තියක් වීමට උත්සාහයක් වුණු ජනප්‍රිය රංගන ශිල්පිනී අනුෂා දමයන්තිටත් පසුගියදා එක්තරා කතාවක් පැතිර ගොස් තිබුණා. ඉතින් හැමදාමත් ඔබ වෙනුවෙන් හඬක් නැඟූ ඇයට සිදුවුණු මේ අසාධාරණය ගැන දැනගැනීමට අපි ඇයට කතා කළා.
අනුෂාගේ මේ දවස්වල වෙලාව හොඳ නැහැ වගෙයි නේද?
ඔව් නේ… නින්දා, අපහාස තමයි ඉතින්.
ඇත්තටම අහස, පොළොව නුහුලන කවදාවත් හිතුවේ නැති කටකතාවක් තමයි මේ මට විරුද්ධව පැතුරුණේ. මට මේ පැතුරුණු කතාව ගැන හිතාගන්න බැහැ. මගේ සහෝදර හිතවතියක් තමයි මට පැවැසුවේ මට විරුද්ධව බරපතළ කතාවක් පැතිරගෙන යන බවත් වලාන දූෂණ මර්දන ඒකකයෙන් මාලබේ මගේ නිවෙසත් වැටලුවා කියලා. ඒ නිවෙසේ දේශීය, විදේශීය කාන්තාවන් තියාගෙන මම ගණිකා ව්‍යාපාරයක් කරගෙන යනවා කියලා බැනවැදිලා. පස්සේ මම මේ පිළිබඳ අමාත්‍ය සරත් වීරසේකර මහතාට දුරකතනයෙන් කතා කරලා කිව්වා. ඒ නිසා මට සහ සරත් වීරසේකර මැතිතුමාට විරුද්ධව කතාවක් පැතිරිලා තිබුණා.
ඔබ අමාත්‍ය සරත් වීරසේකර මහතාව දැනුවත් කළාද මේ මඩ ප්‍රහාරය දැනගත් පසු?
ඔව්… එතුමාට මම මෙය දැනගත් පසුව කතා කළා. ඒ වන විටත් එතුමා මෙය ගැන දැනගෙන පැමිණිල්ලක් දාලා තියෙනවා. මටත් මේ අපහාසය වෙනුවෙන් පැමිණිල්ලක් දාන්න කියලා එතුමා පැවැසුවා. ඒ වගේම අමාත්‍යවරයෙක් වශයෙන් මම මේ වෙනුවෙන් කටයුතු කරනවා නිහඬව ඉන්නේ නැහැ කියලා කිව්වා.
ඇයි ඔබත් අමාත්‍ය සරත් වීරසේකර මහතාත් මෙවැනි අභූත චෝදනාවකට පටලව ගත්තේ?
මට නිළියක් වශයෙන් මඩ ගහනවා නම් මීට කලින් තමයි මෙවැනි දේවල් සිදුවන්නේ. නමුත් මේ දේ කළේ මගේ නම යොදාගෙන සරත් වීරසේකර මහතාට කරපු අපහාසයක්. මෙයට පෙරත් එතුමාට මෙවැනි අපහාස කිරීම් සිදුකර තිබුණු බව අපිට අහන්නට ලැබුණා. කවදාවත් හොඳට ඉන්න කෙනෙකුට හොඳින් මේ රටේ ජනතාවගේ වගකීම් ඉටුකිරීමට ඉඩ දෙන්නැති තවත් පිරිසක් ඉන්නවා. ඔවුන් බලන්නේ හොඳට සිටින මිනිසුන්ගේ ප්‍රතිරූපයට හානි කිරීමටයි. මෙය දේශපාලන පළිගැනීමක් කියලා තමයි මම කියන්නේ.
ඔබ නිරන්තරයෙන්ම හඬක් නැඟුවේ කාන්තා හිංසනය වෙනුවෙන් නේද?
ඔව්… මම දේශපාලන වේදිකාවේ හඬක් නැඟුවේ මේ අසරණ කාන්තාවට සිදුවන හිංසනය වෙනුවෙන් ඒ හඬ අහගෙන ඉන්න බැරි ගොඩදෙනෙක් හිටියා. ඉතින් එහෙම අහගෙන ඉන්න බැරි පිරිසක් කරපු වැඩක් තමයි මේක. හැබැයි මේ කරපු දෙයින් මාව අවුස්සගත්තා කියලා තමයි කියන්න තියෙන්නේ. මේ රටේ සියලුම ජනතාව වෙනුවෙන් මට කැපවීමට තවත් ජවයක් ඇති වුණා කියලා කියන්න පුළුවන්.
නීතිමය මාර්ගයෙන් බලාපොරොත්තු වෙන්නේ මොනවගේ අරමුණක්ද ඔබට වුණු මේ අසාධාරණය වෙනුවෙන්?
සමස්ත කාන්තාවන් වෙනුවෙන් මම මේ ක්‍රියාමාර්ගය ගත්තේ. ගොඩදෙනෙක් ඇත්ත නැත්ත දන්නේ නැහැ. මගේ නිර්දෝෂී බව ඔප්පු කිරීම වගේම මෙවැනි මිනිසුන්ට දඬුවම් කළයුතුයි. නිහඬව හිටියොත් තමයි තව තව දේවල් කිරීමට ඔවුන් උත්සාහ ගන්නේ. ඒ නිසාම තමයි මේ වෙනුවෙන් මම නීතිමය පියවර පතාගෙන සී.අයි.ඩී. එකට ගියේ.
ඔබ දේශපාලනයට ආවේ නැත්නම් මෙවැනි පළිගැනීම් සිදුවන්නේ නැහැ නේද?
මම දේශපාලනයට සම්බන්ධ වීම නිසා තමයි මෙයට ප්‍රධානම හේතුව. අපහාස බලාගෙන තමයි මම දේශපාලනයට සම්බන්ධ වුණේ. හැබැයි මගේ ඒ තිබුණු විශ්වාසයත් එක්ක කෙළින් කතා කිරීමේ කොන්දක් මට තිබුණා. එය ඉවසා දරාගෙන ඉන්න බැරි අය තමයි මට කොහොම හරි පහරක් දෙන්න උත්සාහ කළේ.
-වසන්ත විතරණගේ