8 වන පාර්ලිමේන්තුවේ සිව්වන සභා වාරය උත්සවාකාරයෙන් විවෘත කිරීම අද පෙරවරු 10 ට සිදු කෙරුණා. ඒ, ජනාධිපති ගෝඨාභය රාජපක්ෂ මහතාගේ ප‍්‍රධානත්වයෙන්.
නව සභා වාරය අරඹමින් ජනාධිපතිවරයා සිදුකළ රාජාසන කතාව පහතින් දැක්වේ.
ශ්‍රී ලංකා ප්‍රජාතාන්ත්‍රික සමාජවාදී ජනරජයේ ජනාධිපතිවරයා ලෙස මා හට ඔබතුමාට අමතන්න ලබන්නේ පසුගිය නොවැම්බර් මාසයේදී මේ රටේ බහුතර ජනතාව මා වෙනුවෙන් දැක්වූ විශ්වාසය නිසයි.
මෙහි අසුන්ගෙන සිටින ඔබ කුමන පක්ෂයකට අයත් වුවත් අපි සැම දෙනාගේ වගකීම රටේ ජනතාවගේ සුභ සිද්ධියයි. මා වසර 20 ක් යුධ හමුදාවේ සේවයේ යෙදී සිටියා. මා ක්‍රියාකාරී දේශපාලනයේ යෙදී නැහැ.
මා කුරහන් පැහැ ඇති සාටකය පැළදුවේ නැති උනත් මා නියෝජනය කරන්නේ ඒ පිඩිත ජනතාවයි. මා මේ මොහොතේදී සෞභාග්‍යයේ දැක්ම ප්‍රතිපත්ති ප්‍රකාශය පාර්ලිමේන්තුවේ සභාගත කරනවා. මහජනතාවට පොරොන්දු වූ ආකාරයෙන්ම ඔවුන්ගේ සෞභාග්‍ය උදෙසා මා සහ මාගේ රජය කැපවෙනවා.
ඒ වගේම රජුන් තනන භූමිකාවට ජනතාව ප්‍රතික්ෂේප කර තිබෙනවා. ජාතින් අතර භේද වපුරනවා වෙනුවට ජනතාව එකතු කරගෙන ඉදිරියට යන්න අපි සියලු දෙනා කැපවෙන්න ඕන.
මගේ පාලන සමයේදී රටේ ආරක්ෂාව වෙනුවෙන් හා බුද්ධාගම ආරක්ෂා කරන්න කැපවෙනවා. ඒ වගේම රටේ ඕනෑම පුරවැසියෙකුට තමන් කැමති ආගමක් අදහන්න හැකි.
මා කුඩා කාලයේදී මාගේ පියා පාර්ලිමේන්තුව නියෝජනය කරන විට මෙහි ගැලරියට වී බලා සිට තිබෙනවා. එදා පාර්ලිමේන්තුවේ පැවති හරවත් කතාවන් අද නැහැ. නැවත මේ පාර්ලිමේන්තුව මහජනතාවගේ ගැටළු ගැන කතා කරන තැනක් බවට පත් කරන්න අප කටයුතු කළ යුතුයි. පාර්ලිමේන්තුව ජනතාවගේ ගෞරවය දිනා ගත් ස්ථානයක් බවට පත් කිරීමේ වගකීම මෙහි සිටින මන්ත්‍රිවරුන්ගේ වගකීමයි.
අද මේ රටේ සමාජ දේශපාලන අර්බුධයක් තියෙනවා. නිදහසින් පසුව අපේ රටේ සංවර්ධනය ගැන සෑහීමට පත්වෙන්න බැහැ. මේ තත්ත්වය වෙනස් කරන්න අපි සියලු දෙනාට වගකීමක් තියෙනවා. ඒ වෙනුවෙන් කැපවීමට අප සුදානම් වන්න ඕන. මහජන නියෝජිතයෙක් ගේ මුලික වගකීම මහජන සේවයයි. අපිට ලැබී තිබෙන තනතුරු වරප්‍රසාධ නොවන බව අප තේරුම් ගත යුතුයි.
රටක් සංවර්ධනය කරන්න නිවැරදි දැක්මක් තිබිය යුතුයි. ජනාධිපතිවරනයේදී ජනතාවට හදුන්වාදුන් සෞභාග්‍යයේ දැක්ම ප්‍රතිපත්ති මාලාව පසුගිය වසර 04ක කාලය තුලදී වියත්මග වැඩසටහන් තුලින් මෙන්ම ශ්‍රී ලංකා පොදුජන පෙරමුණ සංවිධානය කළ “ගම සමග පිළිසඳරක්” සහ අනෙක් දේශපාලන පක්ෂ සමග සිදුකළ සාකච්ජා වලදී හෙළිකර ගත් කරුණු, ජනතා අදහස් සහ මාගේ දැක්මද ඊට එක් කරමින් සකස් කළ ජාතික වැඩපිළිවලක්.
එහිදී ජනතාව මත පටවා තිබුණු අධික බදු බර ලිහිල් කිරීම, විනිවිදභාවයෙන් සහ කාර්යක්ෂම පාලනය හා අනවශ්‍ය රාජ්‍ය වියදම් කපා හැරීම වැනි කටයුතු මේ වන විටත් ආරම්භ කර තිබෙනවා.
අපේ ප්‍රතිපත්ති වලට අනුව ජාතික ආරක්ෂාවට ප්‍රමුඛස්ථානයක් ලබාදී තිබෙනවා. ඒ අනුව දක්ෂ නිලධාරීන්ට සුදුසු ස්ථාන ලබාදී තිබෙනවා. ඒ සඳහා බුද්ධි අංශ ශක්තිමත් කර තිබෙනවා. ත්‍රිවිධ හමුදාව සහ පොලිසිය අතර මනා සම්බන්ධයක් ඇති කර තිබෙනවා. පාතාල ක්‍රියාකාරීන්, මත්ද්‍රව්‍ය උවදුර, ස්ත්‍රී දුෂකයින් ගෙන් තොර රටක් බවට මෙය පත් කර යුතුයි.