අවි ආයුධ වෙළෙදාමේ නිරත පුද්ගලයින් බස්නායක නිලමේවරුන් ලෙස පත්කිරීම විහාර දේවාලගම් පනතේ විධිවිධානයන්ට පටහැනි ක‍්‍රියාවක් බව සමස්ත ලංකා බස්නායක නිලමේවරුන්ගේ සංගමය පවසනවා. කතරගම මහා දේවාලයේ වැඩ බලන බස්නායක නිලමේවරයා ලෙස පත්කර සිටින ඩිල්රුවන් රාජපක්ෂ යන අය අවි ආයුධ වෙළෙදාමේ නිරතක පවුලක සාමාජිකයෙකු බවයි එම සංගමය පෙන්වා දෙන්නේ. බස්නායක නිලමේවරයාට හිමි උඩරට මුල් ඇදුම් පැළැදීම පවා එවැනි පුද්ගලයෙකුට අකැප ක‍්‍රියාවක් බව ද එම සංගමය අවධාරණය කර තිබෙනවා.
මේ අතර කතරගම දේවාලයේ වැඩ බලන බස්නායක නිලමේවරයා ලෙස කටයුතු කරන ඩිල්රුවන් රාජපක්ෂ යන අය උඩරට මුල් ඇදුමින් සැරසී සිටින චායාරූපයක් යොදා ගනිමින් තැපැල් මුද්දලරයක් නිකුත් කිරීම සම්බන්ධයෙන් ද මේ වන විට දැඩි කතාවක් නිර්මාණය වී තිබෙනවා. සමස්ත බස්නායක නිලමේවරුන් එම ක‍්‍රියාව හෙළාදැක ඇති බවටයි තොරතුරු වාර්තා වන්නේ. මේ සම්බන්ධයෙන් අවධානය යොමු කරමින් සමස්ත ලංකා බස්නායක නිලමේවරුන්ගේ සංගමය ජනාධිපති මෛත‍්‍රිපාල සිරිසේන මහතා වෙත ලිඛිතව දැනුම් දීමට ද පියවර ගෙන තිබෙනවා.
මෙම කාරණය සම්බන්ධයෙන් වී එෆ් එම් ප‍්‍රවෘත්ති සමස්ත ලංකා බස්නායක නිලමේවරුන්ගේ සංගමයේ ලේකම් සහ බලංගොඩ උග්ගල් අලූත්නුවර කතරගම දේවාලයේ සහ ගොඩකවෙල අම්මඩුව කුඩා කතරගම දේවාලයේ බස්නායක නිලමේවරයා ද වන උදය ඇමටියගොඩ මහතාගෙන් විමසීමක් කළා. ඔහු පෙන්වා දෙන්නේ කතරගම දේවාලය වැනි උතුම් පූජා භූමියක් සදහා මෙවැනි පුද්ගලයින් බස්නායක නිලමේවරුන් ලෙස වැඩ බැලීමට හෝ පත්කිරීම සමස්ත ආගමික හරපද්ධතියටම සිදුකරන අගෞරවයක් බවයි.